Di mi skrifi a buku disi mi skrifi nanga prakseri nanga firi, taki mi de na ini
wan kondre pe mi ben de bifo. Oten mi no sabi. A sori Sranankondre, ma
owktu a gersi wan kondre pe furu sma fu difrenti kulturu e libi. Ma
morofuru na blakasma mi e syi. Mi no abi wan spesrutu presi, pranasi efu
foto ini mi prakseri. Sobun a tori disi kan psa alasei fu Sranan efu a kondre
pe den difrenti sma e bro. Te mi e skrifi ini mi kumbat’tei-tongo mi e firi
bun. A faya na mi inbere e leti tapu fasi, di mi no man ferteri wansma. Dan
baka mi abi a skinfiri taki na den konfo e hori a skriftiki e lon psa a papira.
Sortu konfo, mi no sabi, ete den e gi mi krakti, lobi nanga koni fu ferteri mi
tori. Mi lobi den!
A spikri fu na korpatu-pkin, a tori fu Carmelita, a nyon’nyoni pkin, di poti
leki fendanti, ini a fayason ini wan kepkepi korpatu, fesi a geit fu wan
wetman, di ben mu de en p’pa. Wan man di angri fu abi en eigi pkin. Fosi yu
doro na a kbapisi fu a tori, mi e gi yu wan switi koiri ini a libi fu a wetman,
nanga ala den sma di lontu en. Wan libi di tyari maka nanga takru. Wan libi
pe owktu lobi koni nanga pasensi de.
San tyari a bruya, taki wan m’ma e poti en pkin leki fendanti ini wan
korpatu ini a fayason? A korpatu a no wan sososani. A spikri, di ben de ini a
korpatu, na a frunamku sani gi a pkin, di a e gro kon. Moro sani ben de na
ini, nomo a spikri na en Gado,
en ombra, en yeye sondro fesi. A spikri de na en sei, aladei, sensi a dei di a
sabi taki en na en. Boiti a wan dei di tyari bruya gi en nanga en m’ma. Ala
dreigi di Carmelita kisi ini en yonguyari no ben de na makti fu broko a bribi
ini en spikri. Inibigin Carmelita no ben wani nowansma luku ini en spikri.
Fasi srefi no ben mag. Te a e luku ini a spikri en yeye e kenki. A no e sori de,
a pkin di en m’ma meki. Momenti de pe Carmelita e du law, ini trasma ai,
ete a no law. A koni fu en psamarki. Carmelita na wan srapu pkin bigisma,
di sabi san a wani. Yonguyongu a bigin prati a koni, di en spikri tyari en,
nanga trawan. Kande a spikri sa kenki yu denki tu. Leisi fu fri yu tesi.