A buku disi na den fosi powema fu mi di tai kon na wan. Wan bondru di mi
bigin meki moro leki tin yari psa. Mi ben e denki, skrifi, sreka den, prakseri,
wakti te na ten nanga okasi kisi fu mi tyari den kon na waka. Sonten mi ben
meki trawan syi den, meki den leisi den, bikasi den sma disi ben musu fu
sori na pasi fa morofara. Mi breiti nanga ala yepi. Dan nownowso a ten sori
taki den powema lepi fu moro sma kan syi, nanga yesi den. Mi prati den ini
feifi afersi: Lobi, Ondrofeni, Konsensi, Moksi Patu, nanga Katibo. Mi wegi go
mi wegi kon sortu afersi musu kon na fesi. Fu di mi na wan pkin fu na
pransun fu lobi, a tron lobi. Bika libi e lolo lobi. A singi “Ala mi pikin” na wan
singi di mi skrifi gi den pkin fu a famiri. Now di sowan fu den kon bigi, den
no wani singi en moro. Nomo, mi taigi den taki te mi kanti mi ede, den no
abi fu kon singi en bika mi no sa man yere en moro. Na brada Aschwin Stelk
poti a singi pokunoto fasi. A kisi mi tangi. Den moi kloru prenki, na a
moiwroko-uma, mi swageres Wonny Stüger, meki den. Den de fu bai.
Sondro fu aksi a langa den gi mi, fu moi mi bondru. A sisa sabi taki mi lobi
en. Sowan fu den powema mi brokobroko ini Ptatatongo. Lobi, efu no lobi
den, piki mi, na yu mi e arki, na yu e sori mi a pasi. Tantantan, kon meki mi
no frigiti mi freiri. Bika na a loli fu en okrabrafu e srapu mi, fu hori mi
tnapu. Fu kba, tangi tapu tangi bigi Sisa Gracia Blanker. Sisa mi lobi a
fasi fa yu e skoro mi.